中國 | 香港懷舊6日遊

港澳之旅: 澳門 (1/2) 香港 (2/2)

趁住返馬來清明嘅回程,路過澳門、香港,COVID-19解封後重新投入環遊世界嘅行動。

Hong Kong Deep Travel

Day 3 | 油麻地 & 尖沙咀

同穀姐吃完菠蘿油早餐,再到海港城碼頭坐快艇前往香港上環。行出碼頭撞見聞名已久嘅叮叮車,港島沿海由堅尼地城到筲箕灣,都可以見到電車嘅踪跡。

Hong Kong Tramways MTR

搭地鐵到油麻地Airbnb,發覺每一站格子磚都有代表色。

瞓咗个晏觉先出門,油麻地舊警署就喺隔離街。

Yau Ma Tei 油麻地警署
油麻地警署 & 尖沙咀星光大道

地鐵到尖沙咀站,手扶電梯快,阿伯行路仲快!就連玩緊電話嘅OL都嫌我阻街…

星光大道見識舉世聞名的維多利亞港夜景,塵封已久嘅三腳架終於派上用場。

Hong Kong Victoria Harbour night scene 維多利亞港夜景
香港維多利亞港夜景

地面上搵唔到餐廳,好奇問香港人到底點吃飯?誠品樓下大家樂嘅焗豬扒飯套餐,解決咗飲食問題。

過馬路到1881,另一個英式行政古蹟建築。

Hong Kong 1881 heritage

行過海港城大約300m嘅商場,上到四樓海運觀點時,見天台外大風大雨,仲以為係佈景設計…雲霧裡面留翻半折環球燈景。

唯有早啲返到油麻地寫日記,記低初到香港第一日。

Day 4 | 旺角 & ICC 環球貿易廣場

朝早到旺角掃街,路上四處都係欄杆,環境培養出東莞仔嘅經典懶人跨。 行運茶餐室裝修緊,見唔到阿水哥一面,真係年初四噉嘅樣…

Hong Kong Dim Sum Restaurant 香港茶餐室

花園街、洗衣街附近遊覽,心情上播放緊囍帖街,其實沒有一種安穩快樂,永遠也不差…

吃咗個港式早餐,係公園睇咗場波。

Mong Kok travel 旺角旅遊

女人街滴地攤慢慢開檔,𡃁仔推住貨架都聯想起古惑仔,心諗夜滴港味應該更濃厚。

地鐵返到油麻地,先發覺廟街就喺附近,吃個點心都幻想起雙刀火雞打緊瀨尿牛丸。

Temple Steet 廟街

天后廟應該就係廟街嘅廟。

其實叮叮車、的士、茶餐室同竹棚,先至係我對舊香港嘅印象。

Hong Kong Impression 香港印象

行路出發到海港城,路過金碧輝煌嘅中港城,除了購物就剩返購物…香港另一個新時代。

New Hong Kong 香港現代

雲層厚實,喺港澳仲未見過金黃色嘅太陽,夕陽係無限好,緣分卻是還未到。

China Hong Kong City 中港城

買咗個紅白藍膠袋做手信,依家應該無幾個人識得呢個港式元素。

影完環球貿易廣場嘅夜景,再到返星光大道吹下海風。

International Commerce Centre 環球貿易廣場

返到佐敦站,行過廟街夜市同算命街,舉頭三尺有神明,神仙下凡啊~

Day 5 | 香港島

衣物抌咗喺自助洗衣舖,打開電腦筆記本處理文件,太耐無返工,想起仍然前途迷惘,稍微影響到情緒。

美都餐室食晏,鴛鴦、意粉加西多士。似乎見到劉德華同鄭則仕坐喺窗邊位密斟;著住軍裝嘅邵美琪企喺樓梯口;就等緊達叔大嗌“新鮮蛋撻出爐!”… 食飽喺度發吽哣。

Mido Cafe 美都餐室

地鐵到銅鑼灣時代廣場,與多年無見嘅Yancy會面。

Causeway Bay 銅鑼灣

喺路上,如果有人企得好埋或者行路貼得好近,請勿驚慌,呢啲係香港人嘅習慣距離。

跑馬地今日無馬,一起買咗兩張六合彩,扮下香港人。

到避風塘沿海行到天后,再坐叮叮車到鰂魚涌搵傳說中嘅怪獸大廈。

Causeway Bay Typhoon Shelter 銅鑼灣避風塘

電車後上前落,窗口仲留咗條罅畀我影相。陰天下嘅英皇道港味十足,散發住懷舊氣息。

Quarry Bay 鰂魚涌

位於山邊嘅益昌、益發同海山樓三棟大廈,透過電影呈現屋邨特色。相機GR III鏡頭唔夠寬,表達唔出內心嘅震撼。

Hong Kong Monster Building 香港怪獸大廈

街邊吃咗咖哩魚蛋,搭地鐵返到中環再轉山頂纜車,上太平山睇香港夜景。

Victoria Peak Night View 太平山夜景

冷風底下排隊等住影相,好彩仲有一兩張相無手震。落山纜車再排長龍,一路趕返油麻地紅茶冰室,計劃接落黎嘅行程。

Day 6 | 大嶼山 & 沙田馬場

窗外落緊雨,陳奕迅講得啱,“天氣不似預期 但要走 總要飛”… 拖住蝸牛嘅腳步嚟到黃大仙,求咗支上吉靈籤,犯太歲燒咗張黃紙。

Wong Tai Sin Temple 黃大仙廟

轉咗三條地鐵線到東涌,原來香港除咗扶手電梯快過人,連坐地鐵都會耳鳴…

買杯咖啡再坐纜車上大嶼山,找尋細個嗰陣港劇中睇見嘅佛像。

Lantau Island Cable Car 大嶼山昂坪纜車

天壇周圍發覺唔少政治標語,佛門也難清淨。

Hong Kong Buddha 天壇大佛
香港大嶼山纜車

東涌站會合啱機場甩身嘅Yancy,陀地要帶我去沙田馬會,買唔買返兩手呢?

諗起達叔掉轉咗個9號,喺處嗌“6號!6號!6號… 唔好!唔好!唔好~”。即刻嗌阿Yancy幫我補張9號獨贏,真係贏咗十五蚊!

Hong Kong Horse Racing 沙田跑馬

跑完十一場,等地鐵站人潮散曬先上車到旺角東。

吔咗餐燒臘四拼之燒腩、叉燒、乳豬、燒鵝髀,星馬區啲燒臘拍馬難追。

Mong Kok Night Scene 旺角夜景

無咗招牌嘅香港,猶如失去靈魂,始終都係遲咗一步。

Day 7 | 香港中環

清明後接復活節,思緒有少少混亂… 中環地鐵站附近欣賞電車,近距離接觸Norman Foster作品匯豐大廈。

Hong Kong Norman Foster HSBC 香港匯豐

到中環市場與Yancy會合,喺舊街市內影相。忽然間殺出個港女,要求我洗咗啲相,但我搵渾都無影到佢,個港女就咁行開… 咪以為自己係下一站天后先得噶。

Central–Mid-Levels escalator 香港中環半山扶手電梯

半山自動扶手電梯到蘭芳園,蔥油雞拉丁、加央西多士及絲襪奶茶。哩一程最有價值排行榜,奶茶當之無愧!

Lan Fong Yuen Hong Kong Milk Tea 蘭芳園絲襪奶茶

大館內體驗法院審犯,同監房坐監嘅滋味。

Tai Kwun Hong Kong Heritage 香港中環大館

行落石板街飲咗杯咖啡消磨時間,魏小姐推薦Bakehouse蛋撻,但係已經食唔落啦。

Lan Kwai Fong 蘭桂坊 石板街

Yancy帶我周圍熟悉環境,攰咗就到國際金融中心廣場再飲多杯咖啡。晏啲再搭地鐵往天后站,送別呢位舊友。

自己返到中環,到蘭桂坊兜一轉,夜燈點點期待緊另一個千色夜晚。 影完網上建議嘅車軌、摩天輪夜景,坐天星小輪過海返尖沙咀,最屘嘅香港體驗。

Hong Kong Light Trail 城市光軌

晚餐後到九龍公眾碼頭,告別香港夜景。

Day 8 | 香港商業中心

陽光入室,望出窗外終於見到藍天白雲。去到尖沙咀碼頭,諗住影張有光影嘅香港島,發覺相機忘記叉電。

返到油麻地,同室友Zeng喺紅茶冰室食早餐;北京清華學生,到美國矽谷實習後,啱啱參加完羅馬及巴黎兩個馬拉松。

到中環補影幾張寫字樓,真正嘅香港味。

Hong Kong Business Centre 香港商業中心

香港站坐機場快捷到機場,用留言嘅方式同朋友一一道別。

傍晚時分返到台北,重溫懷舊香港電影。

Hong Kong Subway Map

2 則留言

發佈留言

發佈留言必須填寫的電子郵件地址不會公開。 必填欄位標示為 *